ಅರುಣಾಚಲದ ಮೊದಲ ರಾಮ್ಸರ್ ತಾಣ ‘ಗ್ಲಾವ್ ಲೇಕ್’: ಭಾರತದಲ್ಲಿ ಒಟ್ಟು 101

ಅರುಣಾಚಲ ಪ್ರದೇಶದ ಗ್ಲಾವ್ ಲೇಕ್ (Glaw Lake) ಅನ್ನು ಅಂತರರಾಷ್ಟ್ರೀಯ ಮಹತ್ವದ ರಾಮ್ಸರ್ ತಾಣವಾಗಿ ಘೋಷಿಸಲಾಗಿದ್ದು, ಇದು ಅರುಣಾಚಲ ಪ್ರದೇಶದ ಮೊದಲ ಹಾಗೂ ಭಾರತದ 101ನೇ ರಾಮ್ಸರ್ ತಾಣವಾಗಿದೆ. ಗ್ಲಾವ್ ಲೇಕ್ Kamlang Tiger Reserve and Wildlife Sanctuary ವ್ಯಾಪ್ತಿಯ ಪೂರ್ವ ಹಿಮಾಲಯದ ಸಿಹಿನೀರಿನ ಸರೋವರವಾಗಿದೆ. ಇಲ್ಲಿ ಸಮೃದ್ಧ ಸಸ್ಯಜೀವ ವೈವಿಧ್ಯ ಕಂಡುಬರುತ್ತಿದ್ದು, 150ಕ್ಕೂ ಹೆಚ್ಚು ಮರಪ್ರಭೇದಗಳು ಹಾಗೂ 49 ಆರ್ಕಿಡ್ ಪ್ರಭೇದಗಳು ದಾಖಲಾಗಿವೆ.

ಇದಕ್ಕೂ ಮೊದಲು, ಉತ್ತರ ಪ್ರದೇಶದ ಅಲಿಗಢ್‌ನ ಶೇಖಾ ಝೀಲ್ ಪಕ್ಷಿಧಾಮ (Shekha Jheel Bird Sanctuary) ಭಾರತಕ್ಕೆ 99ನೇ ರಾಮ್ಸರ್ ತಾಣವಾಗಿತ್ತು. ನಂತರ ಉತ್ತರ ಪ್ರದೇಶದ ಬಲ್ಲಿಯಾ ಜಿಲ್ಲೆಯ ಜಯಪ್ರಕಾಶ್ ನಾರಾಯಣ ಪಕ್ಷಿಧಾಮ (Surha Tal) ಭಾರತಕ್ಕೆ 100ನೇ ರಾಮ್ಸರ್ ತಾಣವಾಗಿ ಸೇರ್ಪಡೆಯಾಯಿತು. ಇದು ವಲಸೆ ಮತ್ತು ಸ್ಥಳೀಯ ಪಕ್ಷಿಗಳ ಸಮೃದ್ಧ ಆವಾಸಸ್ಥಾನವಾಗಿದೆ.

ರಾಮ್ಸರ್ ಒಪ್ಪಂದ ಎಂದರೇನು?

Ramsar Convention ಅನ್ನು 1971ರ ಫೆಬ್ರವರಿ 2ರಂದು ಇರಾನ್‌ನ ರಾಮ್ಸರ್ ನಗರದಲ್ಲಿ ಅಂಗೀಕರಿಸಲಾಯಿತು ಮತ್ತು 1975ರಲ್ಲಿ ಜಾರಿಗೆ ಬಂತು. ಭಾರತವು 1982ರ ಫೆಬ್ರವರಿ 1ರಂದು ಈ ಒಪ್ಪಂದಕ್ಕೆ ಸೇರ್ಪಡೆಯಾಯಿತು. ಪ್ರತಿವರ್ಷ ಫೆಬ್ರವರಿ 2ರಂದು ವಿಶ್ವ ತೇವಭೂಮಿ ದಿನ ಆಚರಿಸಲಾಗುತ್ತದೆ.

ತೇವಭೂಮಿ ಎಂದರೆ ಶಾಶ್ವತವಾಗಿ ಅಥವಾ ತಾತ್ಕಾಲಿಕವಾಗಿ ನೀರಿನಿಂದ ಆವೃತವಾಗಿರುವ ಪ್ರದೇಶ. ಇವು ಜೈವವೈವಿಧ್ಯ, ಪ್ರವಾಹ ನಿಯಂತ್ರಣ, ಅಂತರ್ಜಲ ಮರುಪೂರಣ ಮತ್ತು ಕಾರ್ಬನ್ ಸಂಗ್ರಹಣೆಗೆ ಮಹತ್ವದ್ದಾಗಿವೆ.

ಅತಿ ಹೆಚ್ಚು ರಾಮ್ಸರ್ ತಾಣಗಳಿರುವ ರಾಜ್ಯ

ಭಾರತದಲ್ಲಿ ಪ್ರಸ್ತುತ ತಮಿಳುನಾಡು 20 ರಾಮ್ಸರ್ ತಾಣಗಳೊಂದಿಗೆ ಮೊದಲ ಸ್ಥಾನದಲ್ಲಿದೆ. ಭಾರತದಲ್ಲಿ ಒಟ್ಟು 101 ರಾಮ್ಸರ್ ತಾಣಗಳಿವೆ.

ಕರ್ನಾಟಕದ 4 ರಾಮ್ಸರ್ ತಾಣಗಳು

1. ರಂಗನತಿಟ್ಟು ಪಕ್ಷಿಧಾಮ – ಕಾವೇರಿ ನದಿ ದ್ವೀಪಗಳು; ವಲಸೆ ಪಕ್ಷಿಗಳ ಪ್ರಮುಖ ಆವಾಸಸ್ಥಾನ.
2. ಅಂಕಸಮುದ್ರ ಪಕ್ಷಿ ಸಂರಕ್ಷಣಾ ಮೀಸಲು – ವಿಜಯನಗರದ ಪ್ರಮುಖ ಪಕ್ಷಿ ಮತ್ತು ತೇವಭೂಮಿ ಸಂರಕ್ಷಣಾ ಪ್ರದೇಶ.
3. ಅಘನಾಶಿನಿ ನದಿಮುಖ – ಉತ್ತರ ಕನ್ನಡದ ನೈಸರ್ಗಿಕ ಎಸ್ಟ್ಯುವರಿ; ಮ್ಯಾಂಗ್ರೂವ್ ವೈವಿಧ್ಯ ಸಮೃದ್ಧ.
4. ಮಾಗಡಿ ಕೆರೆ ಸಂರಕ್ಷಣಾ ಮೀಸಲು – ಗದಗದ ಕೆರೆ; Bar-headed Goose ಪಕ್ಷಿಗಳಿಗೆ ಪ್ರಸಿದ್ಧ.