ನ್ಯಾನ್ಸಿ ಗ್ರೇಸ್ ರೋಮನ್ ಬಾಹ್ಯಾಕಾಶ ದೂರದರ್ಶಕ

ನಾಸಾ ಸಂಸ್ಥೆಯು 2026ರ ಆಗಸ್ಟ್ 30ರಂದು ಫ್ಲೋರಿಡಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ‘ನ್ಯಾನ್ಸಿ ಗ್ರೇಸ್ ರೋಮನ್ ಬಾಹ್ಯಾಕಾಶ ದೂರದರ್ಶಕ’ವನ್ನು ಸ್ಪೇಸ್‌ಎಕ್ಸ್‌ನ ಫಾಲ್ಕನ್ ಹೆವಿ ರಾಕೆಟ್ ಮೂಲಕ ಯಶಸ್ವಿಯಾಗಿ ಉಡಾವಣೆ ಮಾಡಿತು. ನಾಸಾದ ಮೊದಲ ಮುಖ್ಯ ಖಗೋಳಶಾಸ್ತ್ರಜ್ಞೆ ನ್ಯಾನ್ಸಿ ಗ್ರೇಸ್ ರೋಮನ್ ಅವರ ಗೌರವಾರ್ಥ ಇದಕ್ಕೆ ಹೆಸರಿಡಲಾಗಿದೆ.

ಈ ದೂರದರ್ಶಕವು ಭೂಮಿಯಿಂದ ಸುಮಾರು 16 ಲಕ್ಷ ಕಿಲೋಮೀಟರ್ ದೂರದಲ್ಲಿರುವ ಸೂರ್ಯ–ಭೂಮಿ ವ್ಯವಸ್ಥೆಯ ಎರಡನೇ ಲ್ಯಾಗ್ರಾಂಜ್ ಬಿಂದು—L2 ಸುತ್ತ ಕಾರ್ಯನಿರ್ವಹಿಸಲಿದೆ. ಇದರ ಅವಗೆಂಪು ಕ್ಯಾಮೆರಾ ಹಬಲ್ ದೂರದರ್ಶಕಕ್ಕಿಂತ ಕನಿಷ್ಠ ನೂರು ಪಟ್ಟು ವಿಶಾಲವಾದ ಆಕಾಶಪ್ರದೇಶವನ್ನು ಒಂದೇ ಬಾರಿ ವೀಕ್ಷಿಸಬಲ್ಲದು.

ಡಾರ್ಕ್ ಎನರ್ಜಿ ಎಂದರೇನು?

ಬ್ರಹ್ಮಾಂಡವು ವೇಗವಾಗಿ ವಿಸ್ತರಿಸಲು ಕಾರಣವಾಗಿರುವ ನಿಗೂಢ ಶಕ್ತಿಯನ್ನು ‘ಡಾರ್ಕ್ ಎನರ್ಜಿ’ ಎನ್ನಲಾಗುತ್ತದೆ. ರೋಮನ್ ದೂರದರ್ಶಕವು ದೂರದ ಗ್ಯಾಲಕ್ಸಿಗಳು ಮತ್ತು ಸೂಪರ್‌ನೋವಾಗಳನ್ನು ಅಧ್ಯಯನ ಮಾಡಿ ಇದರ ಸ್ವರೂಪವನ್ನು ತಿಳಿಯಲು ಪ್ರಯತ್ನಿಸಲಿದೆ.

ಡಾರ್ಕ್ ಮ್ಯಾಟರ್ ಎಂದರೇನು?

ಬೆಳಕನ್ನು ಹೊರಸೂಸದ ಅಥವಾ ಪ್ರತಿಫಲಿಸದ, ಆದರೆ ಗುರುತ್ವಾಕರ್ಷಣೆಯ ಮೂಲಕ ಗ್ಯಾಲಕ್ಸಿಗಳ ರಚನೆ ಮತ್ತು ಚಲನೆಯನ್ನು ಪ್ರಭಾವಿಸುವ ಅದೃಶ್ಯ ದ್ರವ್ಯವನ್ನು ‘ಡಾರ್ಕ್ ಮ್ಯಾಟರ್’ ಎನ್ನುತ್ತಾರೆ.

ಇದಲ್ಲದೆ, ಸೂಕ್ಷ್ಮ ಗುರುತ್ವ ಮಸೂರ ವಿಧಾನದಿಂದ ಸುಮಾರು ಒಂದು ಲಕ್ಷ ಹೊಸ ಬಹಿರ್ಗ್ರಹಗಳನ್ನು ಪತ್ತೆಹಚ್ಚುವ ನಿರೀಕ್ಷೆಯಿದೆ. ಈ ಯೋಜನೆ ಬ್ರಹ್ಮಾಂಡದ ಉಗಮ, ವಿಕಾಸ ಮತ್ತು ಭವಿಷ್ಯವನ್ನು ಅರ್ಥಮಾಡಿಕೊಳ್ಳಲು ನೆರವಾಗಲಿದೆ.