Universal School Of Administration Integrated Degree college Admission Open for more details contact: 9686664985

ಎನ್.ಕೆ.ಸಿಂಗ್ ನೇತೃತ್ವದಲ್ಲಿ 15ನೇ ಹಣಕಾಸು ಆಯೋಗ ರಚನೆ

ಎನ್.ಕೆ.ಸಿಂಗ್ ನೇತೃತ್ವದಲ್ಲಿ 15ನೇ ಹಣಕಾಸು ಆಯೋಗ ರಚನೆ

ಭಾರತದ ರಾಷ್ಟ್ರಪತಿಗಳ ಅನುಮೋದನೆ ಪಡೆಎದು ಕೇಂದ್ರ ಸರ್ಕಾರ 15ನೇ ಹಣಕಾಸು ಆಯೋಗವನ್ನು ರಚಿಸಿದೆ. ಹೊಸ ಹಣಕಾಸು ಆಯೋಗ 2020 ಏಪ್ರಿಲ್ 1ರಿಂದ 2025 ಮಾರ್ಚ್ 31 ವರೆಗೆ ಶಿಫಾರಸ್ಸುಗಳನ್ನು ಮಾಡುವ ಅಧಿಕಾರ ಹೊಂದಿರುತ್ತದೆ.

ಆಯೋಗವು ಮುಖ್ಯವಾಗಿ ಕೇಂದ್ರೀಯ ಹಾಗೂ ರಾಜ್ಯ ತೆರಿಗೆಗಳ ಹಂಚಿಕೆ ಬಗ್ಗೆ ಶಿಫಾರಸ್ಸು ಮಾಡುತ್ತದೆ. ಇದು ಒಕ್ಕೂಟ ವ್ಯವಸ್ಥೆಯ ವಿತ್ತೀಯ ಹಾಗೂ ಹಣಕಾಸು ಅಂಶಗಳ ಹಲವು ಪ್ರಮುಖ ಆಯಾಮಗಳನ್ನು ಪರಾಮರ್ಶಿಸಲಿದೆ. ಇದರ ವರದಿಯು 2019 ಅಕ್ಟೋಬರ್ 30 ವೇಳೆಗೆ ಲಭ್ಯವಾಗುವಂತೆ ವ್ಯವಸ್ಥೆ ಮಾಡಲಾಗುತ್ತದೆ.

ಆಯೋಗದ ಸಂಯೋಜನೆ

ಮಾಜಿ ನಾಗರಿಕ ಸೇವಾ ಅಧಿಕಾರಿ ಹಾಗೂ ಮಾಜಿ ಸಂಸದ ಎನ್.ಕೆ.ಸಿಂಗ್ ಅವರು 15ನೇ ಹಣಕಾಸು ಆಯೋಗದ ಅಧ್ಯಕ್ಷರಾಗಿರುತ್ತಾರೆ. ಆಯೋಗದ ಇತರ ಸದಸ್ಯರೆಂದರೆ ಆರ್ಥಿಕ ವ್ಯವಹಾರಗಳ ನಿವೃತ್ತ ಕಾರ್ಯದರ್ಶಿ ಶಕ್ತಿಕಾಂತ ದಾಸ್, ಜಾರ್ಜ್ಟೌನ್ ವೀಶ್ವವಿದ್ಯಾನಿಲಯದ ಪ್ರೊಫೆಸರ್ ಅನೂಪ್ ಸಿಂಗ್. ಇವರ ಜತೆಗೆ, ಬಂಧನ್ ಬ್ಯಾಂಕ್ ಅಧ್ಯಕ್ಷ ಡಾ.ಅಶೋಕ್ ಲಾಹಿರಿ, ನೀತಿ ಆಯೋಗದ ಸದಸ್ಯ ಡಾ.ರಮೇಶ್ ಚಂದ್ ಅವರು ಕೂಡಾ ಅರೆಕಾಲಿಕ ಸದಸ್ಯರಾಗಿರುತ್ತಾರೆ. ಅರವಿಂದ್ ಮೆಹ್ತಾ ಅವರು ಆಯೋಗದ ಕಾರ್ಯದರ್ಶಿಯಾಗಿರುತ್ತಾರೆ.

ಸಂವಿಧಾನಾತ್ಮಕ ಅಂಶ

ಭಾರತ ಸಂವಿಧಾನದ 280(1) ವಿಧಿಯ ಅನ್ವಯ, ಹಣಕಾಸು ಆಯೋಗವನ್ನು ಸಂವಿಧಾನ ಅಸ್ತಿತ್ವಕ್ಕೆ ಬಂದ ಎರಡು ವರ್ಷಗಳ ಒಳಗಾಗಿ ರಚಿಸಬೇಕು. ಬಳಿಕ ಪ್ರತಿ ಐದು ವರ್ಷಗಳಿಗೊಮ್ಮೆ ಅಥವಾ ರಾಷ್ಟ್ರಪತಿಗಳು ಅಗತ್ಯ ಎಂಬ ಅಭಿಪ್ರಾಯಕ್ಕೆ ಬಂದಾಗಲೆಲ್ಲ ಹೊಸ ಆಯೋಗ ರಚನೆ ಮಾಡಬೇಕಾಗುತ್ತದೆ. ಅಗತ್ಯತೆಗಳನ್ನು ಗಮನದಲ್ಲಿಟ್ಟುಕೊಂಡು, ಹಿಂದಿನ ಹಣಕಾಸು ಆಯೋಗವನ್ನು ನೇಮಕ ಮಾಡಿದ ಐದು ವರ್ಷಗಳ ಬಳಿಕ ಹೊಸ ಆಯೋಗವನ್ನು ನೇಮಕ ಮಾಡಲಾಗುತ್ತದೆ. 14ನೇ ಹಣಕಾಸು ಆಯೋಗವನ್ನು ಮೊದಲು ನೇಮಕ ಮಾಡಲಾಗಿತ್ತು.

14ನೇ ಹಣಕಾಸು ಆಯೋಗ

14ನೇ ಹಣಕಾಸು ಆಯೋಗವನ್ನು 2013 ಜನವರಿಯಲ್ಲಿ ನೇಮಕ ಮಾಡಲಾಗಿತ್ತು. ಇದು 2015 ಏಪ್ರಿಲ್ 1ರಿಂದ 2020 ಮಾರ್ಚ್ವರೆಗೆ ಶಿಫಾರಸ್ಸುಗಳನ್ನು ಮಾಡುವ ಅಧಿಕಾರ ಹೊಂದಿರುತ್ತದೆ. ಇದರ ಮುಖ್ಯಸ್ಥರಾಗಿ ಆರ್ಬಿಐ ಮಾಜಿ ಗವರ್ನರ್ ವೈ.ವಿ.ರೆಡ್ಡಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಆಯೋಗ ತನ್ನ ಮೊದಲ ವರದಿಯನ್ನು 2014 ಡಿಸೆಂಬರ್ನಲ್ಲಿ ಸಲ್ಲಿಸಿತ್ತು. 14ನೇ ಹಣಕಾಸು ಆಯೋಗದ ಶಿಫಾರಸ್ಸುಗಳು 2019-20ರವರೆಗೆ ಮಾನ್ಯವಾಗಿರುತ್ತವೆ. ಮೊದಲು ತೆರಿಗೆ ನಿಧಿಯಲ್ಲಿ ರಾಜ್ಯಗಳಿಗೆ ನೀಡುತ್ತಿದ್ದ ಶೇಕಡ 32ರಷ್ಟು ಪಾಲನ್ನು ಶೇಕಡ 42ಕ್ಕೆ ಹೆಚ್ಚಿಸಲು ಆಯೋಗ ಶಿಫಾರಸ್ಸು ಮಾಡಿತ್ತು.

ಹಣಕಾಸು ಆಯೋಗ

ಸಂವಿಧಾನದ 280ನೇ ವಿಧಿಯ ಪ್ರಕಾರ, ಹಣಕಾಸು ಆಯೋಗಕ್ಕೆ ಅರೆ ನ್ಯಾಯಾಲಯದ ಸ್ಥಾನಮಾನವಿದೆ. ಇದನ್ನು ಐದು ವರ್ಷಗಳಿಗೊಮ್ಮೆ ರಾಷ್ಟ್ರಪತಿಗಳು ರಚಿಸುತ್ತಾರೆ. ಹಣಕಾಸು ಆಯೋಗವು ಮಾಡುವ ಶಿಫಾರಸ್ಸುಗಳು ಕೇವಲ ಸಲಹೆಯ ಸ್ವರೂಪವನ್ನು ಹೊಂದಿರುತ್ತವೆಯೇ ವಿನಃ ಸರ್ಕಾರ ಇದಕ್ಕೆ ಬದ್ಧವಾಗಿರಬೇಕಾಗಿಲ್ಲ. ಇದರಲ್ಲಿ ಅಧ್ಯಕ್ಷ ಮತ್ತು ರಾಷ್ಟ್ರಪತಿಗಳು ನೇಮಕ ಮಾಡಿದ ನಾಲ್ವರು ಸದಸ್ಯರಿರುತ್ತಾರೆ. ಕೆಳಗಿನ ಅಂಶಗಳ ಬಗ್ಗೆ ಅದು ರಾಷ್ಟ್ರಪತಿಗಳಿಗೆ ಶಿಫಾರಸ್ಸು ಮಾಡುತ್ತದೆ.

  • ತೆರಿಗೆಯ ಒಟ್ಟು ಸಂಗ್ರಹವನ್ನು ಕೇಂದ್ರ ಹಾಗೂ ರಾಜ್ಯಗಳ ನಡುವೆ ಹಂಚಿಕೆ ಮಾಡುವುದು ಹಾಗೂ ರಾಜ್ಯಗಳ ನಡುವೆ ಇವುಗಳ ಹಂಚಿಕೆ.
  • ಕೇಂದ್ರ ಸರ್ಕಾರ ರಾಜ್ಯಗಳಿಗೆ ನೀಡುವ ಅನುದಾನದ ತತ್ವಗಳು
  • ಕ್ರೋಢೀಕೃತ ನಿಧಿಯನ್ನು ಸಮರ್ಪಕವಾಗಿ ಬಳಸಲು ಅಗತ್ಯವಾದ ವಿಧಾನಗಳು ಹಾಗೂ ಮೂಲಕ ಸ್ಥಳೀಯ ಸರ್ಕಾರಗಳಿಗೆ ಅಗತ್ಯ ಸಂಪನ್ಮೂಲ ಒದಗಿಸುವುದು. ರಾಜ್ಯಗಳ ಹಣಕಾಸು ಆಯೋಗದ ಶಿಫಾರಸ್ಸಿನಂತೆ ಸ್ಥಳೀಯ ಸಂಸ್ಥೆಗಳಿಗೆ ಅನುದಾನ ನಿಗದಿಪಡಿಸುವುದು.
  • ಉತ್ತಮ ಹಣಕಾಸು ವ್ಯವಸ್ಥೆ ದೃಷ್ಟಿಯಿಂದ ರಾಷ್ಟ್ರಪತಿಗಳು ಅಗತ್ಯವೆಂದು ಸೂಚಿಸುವ ಇತರ ಅಂಶಗಳು.
  • ಇದು ಕ್ರೋಢೀಕೃತ ನಿಧಿಯನ್ನು ಪಂಚಾಯತ್ ಮತ್ತು ಪೌರಸಂಸ್ಥೆಗಳ ಸಂಪನ್ಮೂಲಕ್ಕೆ ಪೂರಕವಾಗಿ ಬಳಕೆಯಾಗುವಂತೆ ಮಾಡುವಲ್ಲಿ ಸಮನ್ವಯಗೊಳಿಸುವಂತೆಯೂ ಸಲಹೆ ನೀಡುತ್ತದೆ.

ಇದು ಹಣಕಾಸಿನ ಪ್ರಸ್ತುತ ಸ್ಥಿತಿಗತಿ, ಸಾಲದ ಮಟ್ಟ, ನಗದು ಸಮತೋಲನ, ವಿತ್ತೀಯ ಕೊರತೆ, ಕೇಂದ್ರ ಹಾಗೂ ರಾಜ್ಯಗಳ ಹಣಕಾಸು ಶಿಸ್ತು ಪ್ರಯತ್ನಗಳ ಬಗ್ಗೆಯೂ ಪರಾಮರ್ಶೆ ಮಾಡುತ್ತದೆ. ಇದು ಉತ್ತಮ ಹಣಕಾಸು ನಿರ್ವಹಣೆಗೆ ನೀಲಿನಕ್ಷೆಯನ್ನೂ ಸೂಚಿಸುತ್ತದೆ. ಇದು ತನ್ನ ಶಿಫಾರಸ್ಸುಗಳನ್ನು ಮಾಡುವ ವೇಳೆ, ಕೇಂದ್ರ ಸರ್ಕಾರದ ಮತ್ತು ರಾಜ್ಯ ಸರ್ಕಾರಗಳ ಸಂಪಸನ್ಮೂಲಗಳನ್ನೂ 2020 ಏಪ್ರಿಲ್ 1 ರಿಂದ ಐದು ವರ್ಷಗಳ ಅವಧಿಗೆ ಅಂದಾಜಿಸುತ್ತದೆ. ತೆರಿಗೆ ಪ್ರಮಾಣ ಮತ್ತು ತೆರಿಗೆಯೇತರ ಆದಾಯವನ್ನು 2024-25ನೇ ವರ್ಷದ ವರೆಗೂ ಅಂದಾಜಿಸುತ್ತದೆ.

ಇದರ ಜತೆಗೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳ ಮೇಲೆ ಸರಕು ಮತ್ತು ಸೇವಾ ತೆರಿಗೆಯ ಪರಿಣಾಮಗಳ ಬಗ್ಗೆ ಕೂಡಾ ಅಧ್ಯಯನ ಮಾಡಲಿದೆ. ಇದು ಜಿಎಸ್ಟಿಯ ಪರಿಣಾಮದ ಜತೆಗೆ ರಾಜ್ಯಗಳಿಗೆ ಆಗಬಹುದಾದ ಸಂಭಾವ್ಯ ನಷ್ಟಕ್ಕಾಗಿ ಐದು ವರ್ಷಗಳ ಅವಧಿಗೆ ಪರಿಹಾ ನೀಡುವ ಅಂಶಗಳ ಬಗ್ಗೆಯೂ ಅಧ್ಯಯನ ಮಾಡಲಿದೆ. ರಾಜ್ಯಗಳಿಗೆ ಅಳೆಯಬಹುದಾದ ಸಾಧನೆ ಆಧಾರದಲ್ಲಿ ಉತ್ತೇಜಕಗಳನ್ನು ನೀಡುವ ಬಗ್ಗೆಯೂ ಗಮನ ಹರಿಸಲಿದೆ.

Comment